ਪਾਕਿਸਤਾਨ ਤੇ ਅਫ਼ਗਾਨਿਸਤਾਨ ਵਿਚਾਲੇ ਜੰਗ ਤੇਜ਼: ਕੰਧਾਰ 'ਚ ਤੇਲ ਡਿਪੂ 'ਤੇ ਹਵਾਈ ਹਮਲਾ, ਤੋਪਾਂ ਨਾਲ ਹੋਈ ਗੋਲਾਬਾਰੀ

ਪਾਕਿਸਤਾਨ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਚੱਲ ਰਿਹਾ ਸਰਹੱਦੀ ਵਿਵਾਦ ਹੁਣ ਖ਼ੂਨੀ ਜੰਗ ਦਾ ਰੂਪ ਧਾਰਨ ਕਰ ਚੁੱਕਾ ਹੈ। ਅਫ਼ਗਾਨਿਸਤਾਨ ਵਿੱਚ ਤਾਲਿਬਾਨ ਦੇ ਬੁਲਾਰੇ ਜ਼ਬੀਹੁੱਲਾ ਮੁਜਾਹਿਦ ਨੇ ਦੱਸਿਆ ਕਿ ਪਾਕਿਸਤਾਨੀ ਹਵਾਈ ਸੈਨਾ (PAF) ਨੇ ਕੰਧਾਰ ਹਵਾਈ ਅੱਡੇ ਦੇ ਕੋਲ ਇੱਕ ਨਿੱਜੀ ਏਅਰਲਾਈਨ 'ਕਾਮ ਏਅਰ' (Kam Air) ਦੇ ਬਾਲਣ ਡਿਪੂ 'ਤੇ ਹਮਲਾ ਕੀਤਾ ਹੈ। ਮੁਜਾਹਿਦ ਅਨੁਸਾਰ, ਇਹ ਕੰਪਨੀ ਘਰੇਲੂ ਜਹਾਜ਼ਾਂ ਦੇ ਨਾਲ-ਨਾਲ ਸੰਯੁਕਤ ਰਾਸ਼ਟਰ (UN) ਦੇ ਜਹਾਜ਼ਾਂ ਨੂੰ ਵੀ ਤੇਲ ਸਪਲਾਈ ਕਰਦੀ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਪਾਕਿਸਤਾਨ ਪਹਿਲਾਂ ਵੀ ਅਫ਼ਗਾਨ ਵਪਾਰੀਆਂ ਦੇ ਤੇਲ ਭੰਡਾਰਾਂ ਨੂੰ ਨਿਸ਼ਾਨਾ ਬਣਾ ਚੁੱਕਾ ਹੈ।

ਤੋਪਾਂ ਦੀ ਗੜਗੜਾਹਟ: ਇੱਕੋ ਪਰਿਵਾਰ ਦੇ 4 ਜੀਅ ਹਲਾਕ

ਇਸ ਦੌਰਾਨ, ਪਾਕਿਸਤਾਨੀ ਫੌਜ ਨੇ ਖੋਸਤ ਸੂਬੇ ਦੇ ਅਲੀਸ਼ੇਰ-ਤੇਰੇਜ਼ਈ ਇਲਾਕੇ ਵਿੱਚ, ਡੂਰੰਡ ਲਾਈਨ ਦੇ ਨੇੜੇ ਤੋਪਾਂ ਨਾਲ ਭਾਰੀ ਗੋਲਾਬਾਰੀ ਕੀਤੀ। ਰਿਪੋਰਟਾਂ ਅਨੁਸਾਰ, ਇਸ ਗੋਲਾਬਾਰੀ ਦੀ ਲਪੇਟ ਵਿੱਚ ਆਉਣ ਕਾਰਨ ਇੱਕੋ ਪਰਿਵਾਰ ਦੇ 4 ਮੈਂਬਰਾਂ ਦੀ ਮੌਤ ਹੋ ਗਈ, ਜਦੋਂ ਕਿ 3 ਹੋਰ ਗੰਭੀਰ ਜ਼ਖ਼ਮੀ ਹੋ ਗਏ। ਜ਼ਿਕਰਯੋਗ ਹੈ ਕਿ ਫਰਵਰੀ ਮਹੀਨੇ ਤੋਂ ਸਰਹੱਦ 'ਤੇ ਹਮਲੇ ਤੇਜ਼ ਹੋ ਗਏ ਹਨ ਅਤੇ ਪਾਕਿਸਤਾਨ ਵੱਲੋਂ ਕਾਬੁਲ ਸਮੇਤ ਕਈ ਸ਼ਹਿਰਾਂ 'ਤੇ ਪਹਿਲਾਂ ਵੀ ਏਅਰਸਟ੍ਰਾਈਕ ਕੀਤੀ ਜਾ ਚੁੱਕੀ ਹੈ।

'ਖੁੱਲ੍ਹੀ ਜੰਗ' ਅਤੇ ਜਵਾਬੀ ਕਾਰਵਾਈ

ਪਾਕਿਸਤਾਨ ਦੇ ਰੱਖਿਆ ਮੰਤਰੀ ਖਵਾਜਾ ਆਸਿਫ਼ ਨੇ ਮੌਜੂਦਾ ਸਥਿਤੀ ਨੂੰ 'ਖੁੱਲ੍ਹੀ ਜੰਗ' ਕਰਾਰ ਦਿੰਦਿਆਂ ਤਾਲਿਬਾਨ 'ਤੇ ਅੱਤਵਾਦ ਨੂੰ ਹੱਲਾਸ਼ੇਰੀ ਦੇਣ ਦੇ ਦੋਸ਼ ਲਾਏ ਹਨ। ਦੂਜੇ ਪਾਸੇ, ਅਫ਼ਗਾਨਿਸਤਾਨ ਦੇ ਰੱਖਿਆ ਮੰਤਰਾਲੇ ਨੇ ਦਾਅਵਾ ਕੀਤਾ ਹੈ ਕਿ 26 ਫਰਵਰੀ ਨੂੰ ਕੀਤੀ ਗਈ ਜਵਾਬੀ ਕਾਰਵਾਈ ਵਿੱਚ 55 ਪਾਕਿਸਤਾਨੀ ਸੈਨਿਕ ਮਾਰੇ ਗਏ ਸਨ।

ਵਿਵਾਦ ਦੀ ਜੜ੍ਹ: ਡੂਰੰਡ ਲਾਈਨ ਅਤੇ TTP

ਪਾਕਿਸਤਾਨ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਟਕਰਾਅ ਦੇ ਦੋ ਮੁੱਖ ਕਾਰਨ ਹਨ:

ਅਫ਼ਗਾਨਿਸਤਾਨ ਇਸ ਸਰਹੱਦੀ ਲਕੀਰ ਨੂੰ ਮੰਨਣ ਤੋਂ ਇਨਕਾਰ ਕਰਦਾ ਹੈ।

ਪਾਕਿਸਤਾਨ ਦਾ ਦੋਸ਼ ਹੈ ਕਿ ਅਫ਼ਗਾਨਿਸਤਾਨ ਦੀ ਸਰਜ਼ਮੀਨ 'ਤੇ TTP ਵਰਗੇ ਅੱਤਵਾਦੀ ਸਮੂਹਾਂ ਨੂੰ ਪਨਾਹ ਮਿਲ ਰਹੀ ਹੈ।

ਇਸ ਸੰਗਠਨ ਦਾ ਗਠਨ 2007 ਵਿੱਚ ਪਾਕਿਸਤਾਨ ਵਿੱਚ ਹੋਇਆ ਸੀ। ਹਾਲਾਂਕਿ ਇਹ ਅਫ਼ਗਾਨ ਤਾਲਿਬਾਨ ਨਾਲੋਂ ਵੱਖਰਾ ਹੈ, ਪਰ ਦੋਵਾਂ ਦੇ ਵਿਚਕਾਰ ਵਿਚਾਰਧਾਰਕ ਸਾਂਝ ਡੂੰਘੀ ਮੰਨੀ ਜਾਂਦੀ ਹੈ। ਹਾਲ ਹੀ ਦੇ ਸਮੇਂ ਵਿੱਚ ਪਾਕਿਸਤਾਨ ਦੇ ਖੈਬਰ ਪਖਤੂਨਖਵਾ ਅਤੇ ਬਲੂਚਿਸਤਾਨ ਸੂਬਿਆਂ ਵਿੱਚ ਹਿੰਸਕ ਹਮਲਿਆਂ ਵਿੱਚ ਭਾਰੀ ਵਾਧਾ ਹੋਇਆ ਹੈ।